ბეთლემის უბნის რევიტალიზაცია

პროგრამის მიზნია ხელი შეუწყოს თბილისის ისტორიული ნაწილის დაცვას. საპილოტე პროექტის ამოცანაა კალაში, ბეთლემის უბნის განვითარება ინტეგრირებული კონსერვაციის გზით და ადგილობრივი თემის აქტიური მონაწილეობით ხელი შეუწყოს ისტორიული უბნის რევიტალიზაციას, უბნის ტურისტული პოტენციალის განვითარებას, მოსახლეობის სოციალური მდგომარეობის გაუმჯობესებას.

ბეთლემის უბნის რევიტალიზაციის პროგრამა 2000 წელს მსოფლიო მემკვიდრეობის ფონდის მხარდაჭერით დაიწყო. 2004-2005 წწ.-ში UNESCO-ს და ნორვეგიის საგარეო საქმეთა სამინისტროს დახმარებით მომზადდა ბეთლემის უბნის კონსერვაციის გეგმა და მისი განვითარების მრავალდისციპლინარული გეგმა.

2005-2011 წწ.-ში ნორვეგიის კულტურული მემკვიდრეობის დირექტორატისა და ნორვეგიის საგარეო საქმეთა სამინისტროს მხარდაჭერით ეტაპობრივად განხორციელდა დაგეგმილი სამუშაოები: ადგილობრივი მოსახლეობის წვრთნა ტრადიციულ ხელოსნობასა და რესტავრაციის პრინციპებში, ისტორიული საზოგადოებრივი სივრცეების რეაბილიტაცია, ისტორიული სახლებისა და არქეოლოგიური ძეგლის – ათეშგას რესტავრაცია, შეიქმნა ბეთლემის უბნის ტურისტული მარშრუტი, დაფუძნდა ბეთლემის უბნის ყოველწლიური ფესტივალი. უბანში განთავსდა ICOMOS საქართველოს ოფისი, რომელიც ასევე მოქმედებს, როგორც უბნის საინფორმაციო და ადგილობრივი თემის ცენტრი. ICOMOS საქართველო აქტიურად თანმშრომლობს უბნის მოსახლეობასთან, კონსულტაციებს უწევს  მათ ისტორიული სახლების მოვლას, რესტავრაციასა და განვითარების საკითხებზე, რის შედეგადაც უბანს უკვე შეემატა კერძო ინიციატივითა და სახსრებით რესტავრირებული ისტორიული ბინები, ფასადები, ინტერიერები და სახლები.